10
август
2023
Абай күні
Бүгін – Абай күні. Ұлтымыздың ұлы ақыны, хәкім Абайдың шығармашылығын кеңінен дәріптеу мақсатында атаулы күн 2020 жылғы 5 тамызда еліміздің мерекелер күнтізбесіне енді.
Абай – ұлтымыздың болмысы мен бітімінің айқын үлгісі. Абай – әлем әдебиеті мен мәдениетін қастерлі асыл қазыналармен байытқан бірегей тұлға. Күллі адамзатқа ортақ кемеңгер шығармаларының әлемнің 30-дан астам тіліне аударылуы – бұл сөзімізге айқын дәлел.
Абайдың өміршең һәм өнегелі әдеби мұрасы – біздің өркениетіміздің алтын тұғырына айналуы тиіс.
Мемлекет басшысы Қасым-Жомарт Тоқаев «Абайды тану – адамның өзін-өзі тануы. Адамның өзін-өзі тануы және үнемі дамып отыруы, ғылымға, білімге басымдық беруі – кемелдіктің көрінісі. Интеллектуалды ұлт дегеніміз де – осы», – деп атап өткен.
Ұлы ақынның ой-тұжырымдары баршамызға қашанда рухани сарқылмас азық, таусылмас қазына бола бермек. Баршаңызды Абай күнімен құттықтаймыз!